Македонската фолк сцена добива уште еден квалитетен уметник кој со својот вокал и тоа како ќе го задржи вашето внимание.

Станува збор за битолчанецот Менде Куновски, кој вчеравечер (четврток) пред своите најблиски пријатели, колеги, роднини, но и вљубеници во убавата песна, го промовираше своето првенче во еден познат битолски ресторан.

“Празен календар” е насловот на овој деби-сингл на Куновски, а на кој како автори се потпишуваат едни од најдокажаните имиња, Николче Мицевски (музика и аранжман) и Борче Нечовски (текст). Песната е пак снимена во студио “XL Момировски”.

Ако досега бевме навикнати да слушаме фолк-песни во кои преовладуваат зурли и тапани, овој пат не е така. Токму овој проект докажува дека на овие наши простори има капацитет да се создаде и квалитетна модерна фолк-песна.

– Долги години бев член на битолската група “Алтернатор”, но решив дека е вистинско време да создадам нешто сам и нешто што ќе остане да се слуша долги години. Јас вака го замислувам новиот фолк-звук во нашата земја и убеден сум дека ќе и се допадне на публиката – вели Куновски, кој не крие дека му е драго што за првенчето соработувал со најдобрите.

– Да се работи со Николче и Борче е чест и привилегија. Вистински мајстори во својот занает, впрочем и нивните дела кои ги имаат создадено сведочат за тоа што јас го зборувам – завршува Куновски.

Се разбира, новата песна беше и екранизирана од рацете на вредната екипа од “Веста Продукција”.

Инаку ова е само почеток, бидејќи во блиска иднина повторно ќе го видиме и слушнеме Менде со нова песна.

А, сега погледнете и уживајте: