Во кино „Милениум“ вечерва од 20 часот ќе биде отворен 4. „Киненова“ – интернационален фестивал посветен на дебитанти. Во натпреварувачката програма се седум филмови кои се први или втори остварувања на режисерите. Специјална гостинка на годинашниот фестивал е српската и ексјугословенска актерка Тања Бошковиќ, на која ќе ѝ биде доделено признание за посебен придонес во светската филмска уметност.

На отворањето на фестивалот ќе биде прикажан бугарскиот филм „Таткото“, победникот на фестивалот во Карлови Вари оваа година.

Во натпреварувачка конкуренција годинава се филмовите: „Сожалување“ на Бабис Макридис од Грција,  бугарскиот „Прасето“ на Драгомир Шолев, српскиот „Шевови“ на Мирослав Тадиќ, хрватскиот „Алекси“ на Барбара Викариќ, рускиот „Човекот кој ги изненади сите“ на Наталија Меркулова и Алексеј Чупов, бразилскиот филм „Сократес“ на Алешандре Морато и германскиот документарен филм  „Љубовен автомобил“ на Елкe Леренкраус.

За наградите ќе одлучува тричлено жири предводено од Витали Мански, еден од авангардните современи филмски автори, чиј контроверзен филм  „Путиновите сведоци“ ќе има специјална проекција на „Киненова“. Овој филм лани победи на фестивалот во Карлови Вари во селекцијата за документарни филмови, а Мански е во егзил во Летонија.

Фестивалот ќе трае до 13 октомври под слоганот „Првоборци“ соодветно на неговата мисија – да промовира вредности за општо добро, односно да донесува автори-дебитанти кои и покрај контроверзиите и преземените ризици не само што не се повлекле од идејата, туку со своите филмови поттикнале и општествени дебати.

Покрај филмовите од натпреварувачката програма, ќе има и специјална програма „Во фокус“ за  унгарската кинематографија, програма „Посветено на“ – со филмови од турската филмска авторка Јесим Устаоглу, која е и член на жирито, како и презентација на наградата „Лукс“ на Европскиот парламент востановена во 2007, со прикажување пет филма меѓу кои и македонските „Господ постои, името ѝ  е Петрунија“ и документарниот „Медена земја“.

Проекциите ќе бидат во Кинотеката во термините од 18, 20 и од 22 часот, а програмски содржини ќе има и во „Котур“.