Од овој месец, граѓаните кои се греат на парно, ќе плаќаат пониски сметки за затоплување, рече на денешната прес-конференција пратеникот од СДСМ, Диме Велковски.

Откако беше донесена одлуката за намалување на ДДВ за топлинска енергија од 18 на 5 отсто, се овозможија услови за намалување на вкупните трошоци на потрошувачите на парно, додае тој.

Според одлуката на Регулаторната комисија за енергетика, цената на парното во системот на БЕГ како најголем снабдувач со топлинска енергија во Скопје се намалува за 6 отсто.

„Тоа значи дека секое семејство, приклучено на централното парно греење со стан со просечна квадратура,  добива пониска сметка за околу 220 денари или на годишно ниво над 2000 денари заштедени пари во секое домаќинство, кое се грее на парно“, рече Велковски.

Тој рече дека на ова намалување му претходеше и укинувањето на паушалот за парно на исклучените граѓани што неправедно го плаќаа со години.

„Паралелно со ова, Град Скопје ја доби на трајно користење, топловодната мрежа, со која ќе управува новоформираното претпријатие за дистрибуција на топлинска енергија и гас, Градски Енергетски Системи (ГЕС). Ова претпријатије има за цел преку реални енергетски политики, одговорен пристап кон енергетската ефикасност и рационален пристап во комбинирањето на топлификациската и гасоводната мрежа низ градот да донесе големи придобивки за граѓаните“, рече Велковски.

Целта на Градот е парното греење да биде достапно за сите, со пониски сметки, да се запре досегашниот бран на исклучување  и нивно повторно враќање во мрежата, но и привлекување на нови корисници, што позитивно ќе влијае на намалување на аерозагадувањето предизвикано од загревање на домовите, појасни тој.