Здравствениот систем е во тотален хаос. Несомнено, скандалот со вакцините е дно на дното, доказ за аматеризмот и неспособноста на оваа власт, рече на денешната прес-конференција Ленче Нелоска од ВМРО-ДПМНЕ.Таа додаде дека министерот за здравство, Венко Филипче и премиерот Зоран Заев во најмала рака се однесуваат скандалозно. Филипче и Заев си поигруваат со здравјето на децата, со здравјето на граѓаните.

„Прво, излегува на виделина дека има вакцини со изминат рок. Потоа, излегува министерот Филипче и вели дека вакцините не се со изминат рок, само имаат погрешна декларација. За сега да падне одлука – вакцините да се уништуваат!

Министре, излезете во јавност и објаснете им на граѓаните што правите? Освен лаги и манипулации, грижа за интересите на вашите блиски, се интересирате ли воопшто за нешто друго?!

Зошто, наместо само да го почитувате законот, и веднаш да ги уништите спорните флакони, вие направивте турска серија од настанот. Човек да се запраша дали навистина промовирате вакцинација или не“, рече Нелоска.

Таа притоа истакна дека со неадекватното однесување се испраќаат погрешни пораки, се зголемувате несигурноста на и така вознемирените родители и се прави непоправлива штета на здравствениот систем.

„Во период на прогласена епидемија на морбили вие создадовте тотален хаос.

Како можевте министре да дозволите, во период кога е прогласена епидемија на морбили, Клиниката за детски болести да не спроведува мерки кои се предвидени со закон. Дозволивте да се доведат во ризик стотици болни деца кои секојдневно поминуваат низ клиниката. Дозволивте епидемијата да ги погоди и најранливите, децата со малигни и други сериозни болести. Дозволивте вработените да бидат зафатени, а потоа и ризик фактор за ширење на епидемијата“, истакна Нелоска.Таа предупреди дека освен епидемија на морбили, веќе има бројка од над 500 лица заболени со грип.

„И како да е сето малку ова претходново кажано, изминатава седмица, наместо да се занимаваат со епидемијата на морбили, како и скандалот со вакцините, министерот Филипче, премиерот Заев како и други бројни претставници на власта, беа впрегнати во лов на гласови од професорите на Медицински факултет во Скопје, со притисоци и уцени нормално, да се изгласа комисија која ќе го избере за доцент пуленот на СДСМ. Замислете, и министерот е член на таа комисијата.

Небитно е што Законот за спречување на корупција вели дека тој како носител на јавна функција треба да се изземе од вакви комисии.Небитни се критериумите, небитна е автономијата на универзитетот за која што толку се бореа. Сега Заев и Филипче бираат доценти на Медицински факултет. Го средија здравството, па сега на ред е образованието.

Срамота!“, заврши Ленче Нелоска.