Дејвид Гета со – „FULL MONOLITH STADIUM SHOW“, на 8 септември доаѓа во Скопје за прославата на 35 години независност, беше соопштено на денешната прес конференција на која говореа Марија Митева, портпарол во Владата и Бобан Милошески од „Авалон“, кој ќе го реализира концертот во соработка со Владата.

Настаните од прославата ќе се одржуваат од 8 август до 8 септември, кога на стадионот „Тоше Проески“ во Скопје ќе настапи Дејвид Гета. Како главна ѕвезда на прославата, и по негово барање, на денешниот прес во Скопје, само тој беше најавен од изведувачите, а во наредниот период ќе бидат најавени уште два светски настани за прославата и други 120 учесници од Македонија кои ќе ја збогатат програмата за државниот јубилеј, не само во Скопје, туку и низ државата.

Нашата цел е ова одбележување да има и државничка тежина, современ културен и продукциски пристап, но и меѓународна препознатливост, истакна денес, портпаролката на Владата, Марија Митева.

Спeктaклот наречен David Guetta – The Monolith Stadium Show во Арената Тодор Проески ќе биде бесплатен јавен настан со регистрација за симболична цена од 35 МКД по човек, број кој директно асоцира на годинешниот државен јубилеј, со цел запазување на капацитетот на стадионот;

Мојата основна идеја беше дека ако славиме, треба да славиме. Ако е бал, треба да биде маскенбал. Без сериозна конкуренција, најголемото шоу на европски артист оваа година се вика ‘David Guetta Full Monolith Stadium Show’. Од музички, а особено од продукциски аспект, ова е нешто досега невидено во европски рамки, а можам да кажам и во светски рамки. И ние се потрудивме истото тоа шоу да го видиме и во Скопје на 8 септември“, рече Милошески.

Секој корисник ќе биде ограничен на максимум 2 влезници, а дозволена ќе биде и регистрација од останатите држави, земајќи предвид дека настан од овој калибар привлекува огромно внимание од целиот регион и привлекува публика, гости и посетители од околните земји и истиот има сериозен импакт врз туризмот, угостителството и целокупната промоција на градот и државата како дестинација за големи светски музички и културни случувања“, беше потенцирано денес.

Дополнителни информации околу процедурата за регистрација официјално ќе бидат објавени утре од страна на „Avalon International Booking“, организаторот на настанот.

Според официјалниот сајт на Дејвид Гета, „The  Monolith Tour“ ќе собере извонредна публика во некои од најголемите градови на континентот, вклучувајќи историски три вечери во Париз со над 80.000 посетители по вечер, масивен спектакл во Милано со 100.000 луѓе и уште една голема вечер во Амстердам, на Стадионот на Ајакс, со повеќе од 70.000 посетители, потврдувајќи го David Guetta како едно од најголемите светски стадионски мејнстрим музички имиња денес.

Гета последен пат настапи во Скопје во 2016 година, во рамки на „Скопје колинг“, на тогашниот стадион „Филип Втори“, денешна Национална арена „Тоше Проески“. Настанот се одржа на 5 јуни 2016 година.

Edit