На 22 мај, среда ќе има прегласување на седум избирачки места, изјави претседателот на Државната изборна комисија Александар Даштевски.

Прегласувањето ќе се одвива на 6 избирачки места во Петтата изборна единица, и на едно избирачко место во ИЕ 6.

„Предлог решение за повторување на гласање во ИЕ 5, на избирачки места 1470/1, 1470 во општина Долнени. Избирачко место 1184, избирачко место 1202 во општина Крушево, избирачко место 1844 во општина Струга и избирачко место 1272 во општина Охрид. Констатирам дека Комисијата едногласно го одобри предлогот за прегласување на овие избирачки места. Предлагам да ја усвоиме точката 3, барам да гласаме, Кој е за? Констатирам дека точка 3, предлог-одлуката за повторување на гласањето во ИЕ 6, во избирачко 2101 во општина Желино, едногласно е усвоена“, рече Даштевски.

Управниот суд вчера ги отфрли како неосновани сите седум тужби од Европскиот фронт, поднесени против решенијата на Државната изборна комисија поврзани со изборите одржани на 8 мај. Од коалицијата „Вреди“ ја поздравија одлуката оценувајќи дека е во согласност со волјата на граѓаните, а од „Европскиот фронт“ претходно обвинија за изборен инженеринг кој како што рекоа има за цел да го промени односот на бројките во Собранието преку политички договор.