Од денеска е задолжително носењето заштитни маски и на отворено. За непочитување на мерката предвидена е казна од 20 евра.

Оваа мерка е една од сетот, што синоќа го донесоа пратениците на македонското Собрание, предвиден со измените на Законот за заштита на населението од заразни болести.

Носењето маска на отворено нема да биде задолжително при спортување на отворен простор, при возење во приватно патничко возило, ако возачот е сам или со лице со кое живее во заедницата, при престојување во двор во семејна куќа со лица од истата семејна заедница, или во угостителски објект каде се применуваат специфичните протоколи за заштита.

Mаска на отворено нема да се носи ако се користи друг тип на заштитна опрема специфична за определено работно место, ако лицето е помладо од 6 годишна возраст и ако лицето има специфична здравствена состојба (лице со посебни потреби или е лице со пречки во развој), поради што носењето на лична заштита на лицето би било проблематично.

Со Законот, самоизолацијата е задолжителна при тестирање за ковид-19, од закажување на тестот или самото тестирање до добивање на резултатот, а самоизолацијата продолжува ако резултатот е позитивен. За прекршување на самоизолацијата казната е 50 евра.

Од денеска, исто така, забрането е и групирање на отворено по 22 часот.

Измените на законот вчера беа донесени со 53 гласови „за“, 26 воздржани, а немаше пратеници кои гласаа против.