Корона заразата одзема животи. А, комисијата за заразни болести не е на нивото на задачата, и главниот проблем е што се исполнуваат политички нарачки, наместо да се носат одлуки за заштита на здравјето.Во ситуација кога се вклучува политичкиот калкулатор за броење на новозаразени, а со цел да се глуми нормалност наместо реално да се тестира, секоја погрешна одлука ќе се врати како бумеранг со поголеми проблеми од претходно, истакна во денешното обраќање лидерот на ВМРО-ДПМНЕ, Христијан Мицкоски.

Тој нагласува дека веќе сме веќе влезени во слепа улица поради клучните амбиции на Заев, кариерата на Спасовски или диктатите врз комисијата, туку државава се движи во  еднонасочна улица во сосема спротивната страна од насоката на движењето.

Сите држави околу нас излегоа како победници од кризата, а ние се претвораме во балкански Вухан со бројки како на самиот почеток на светската пандемија. Јас не сум доктор, и не сум медицинско лице, ќе оставам експертите и стручните лица да елаборираат за останатото, но јас сум подеднакво загрижен за она што се случува во економијата. Таму ни се случува навистина стравичен пад-истакна Мицкоски.

Тој се осврна на  неколку индикатори кои што се од клучно значење за иднината на нашата македонска економија, но и за иднината на реалниот сектор. Еден од нив е и објавата на  Државниот завод за статистика за показателот  кој што го детерминира растот на БДП во првиот квартал.

Се сеќавате кога Заев, Спасовски, Царовска, Ангеловска не убедуваа дека блескаме, дека економијата практично соборува резултати? Е, вчерашниот податок сето тоа го демантира, но го демантира на брутален начин. Имено, катастрофалниот низок раст на македонската економија во првиот квартал изнесува нешто повеќе над нулата или цели 0.2%. А, каков е случајот во околината и каков е случајот со останатите балкански земји?-праша Мицкоски.

Тој споредува дека  Србија книжи раст од цели 5%, понатаму Турција од 4.5%, Хрватска 0.4%, соседна Бугарија од 1.2%.

И сите овие кои што неколкукратно имаат поголем БДП од нас во првиот квартал го демантираат она кое што го велеше Зоран Заев и во парламентот кога ја примопредаваше функцијата премиер, односно претседател на Владата, и сето она кое што понатаму го спомнуваа ресорните министри дека блескаме и дека економијата ни е на прав пат.

Според Мицкоски, втор индикатор кој исто така загрижува и кој што  можеби прв пат ни се случува после неколку години е намалувањето, драматичното намалување на извозот во првите четири месеци од годината, а најмногу тоа се чувствува практично во четвртиот месец или месец  април.

Имено падот во месец април изнесува цели 60% на извозот. Ќе повторам македонската економија успеала да извезе стоки во светот за 60% помалку овој април споредено со април во 2019 година, а во првите четири месеци почнувајќи од први јануари завршувајќи со триесетти април македонската економија успеала да извезе за 21.5% помалку стока споредено со истиот период во 2019 година. Ќе повторам во првите четири месеци од 2020 година македонската економија успеала да извезе за 21.5% помалку од тоа што го направила за истиот период во 2019 година.

 

Мицкоски ја замолува Владата да се надмине себе си, да го надмине оној примитивизам кој што ги опкружува.

Нека ги продолжат мерките за помош на реалниот сектор и стопанството и да не завршат тие заклучно со месец мај. Да ги продолжат и за месеците јуни, за месеците јули и за месецот август затоа што тоа му е потребно на реалниот сектор. Само здрав реален сектор ќе значи и здрава македонска економија.