Властите предупредуваат дека постои опасност од отцепување на 250.000 метри кубни мраз од глечер на врвот Гранд Жорас, пренесува БиБиСи. Експертите велат дека е невозможно да се предвиди кога ќе се одвои ледената маса, но дека глечерот се лизга со брзина од 50-60 см на ден.

Италијанските власти ги затворија патиштата и ги евакуираа планинските колиби.

Градоначалникот на блискиот град Курмајор рече дека глобалното затоплување го менува изгледот на планината.

Она што се случува сега, уште еднаш покажува дека планината претрпе период на големи промени како резултат на климатските фактори и природата е ранлива, изјави градоначалникот Стефано Мисерочи за италијанските медиуми.

Мон Блан е највисокиот планински венец во Западна Европа и има 11 врвови над 4.000 метри во Франција и Италија, кои ги посетуваат стотици илјади туристи секоја година.