Досегашниот министер за надворешни работи на Белгија, Дидие Рејндерс, е назначен за европски комесар од оваа земја. Според процедурата, комесарите треба прво да бидат сослушани и потврдени од страна на европратениците.

По неколку недели остри препукувања, техничката влада во Белгија конечно се одлучи да го предложи Рејндерс за еврокомесар во следниот состав на Европската Комисија.

Рејндерс доаѓа од истата политичка партија (Реформаторско движење, либерали) како и идниот претседател на Европскиот Совет, Шарл Мишел, досегашен премиер на Белгија.

Рокот за пријавување на кандидати за еврокомесари од секоја земја членка е 26 август. Само Франција и Италија сѐ уште не поднеле свои предлози.

Дидие Рејндерс во моментов е назначен од кралот Филип втори како „информатор“ со цел поддршка на процесот на формирање на федерална влада во Белгија, но преговорите за формирање на влада сѐ уште не се започнати, потсетува портпаролот на техничката влада.

Кандидатите за еврокомесари ќе бидат прво сослушани од претседателката Урсула фон дер Лајн, потоа тие треба да бидат одобрени од страна на земјите членки, и сослушани од страна на европратениците. Европскиот Парламент треба да го одобри конечниот список на еврокомесари во текот на септември или октомври.

Новата Комисија треба да стапи на функција на први ноември.