Продолжува крвавиот судир меѓу црногорските криминални групи. 33-годишниот Бобан Сјеклоќа, истакнат член на Шкаљарскиот клан од Цетиње, беше пронајден мртов во автомобил „Голф“ со подгорички таблички кај плажата Трстено, во близина на Будва.

Според информациите од Вишото државно обвинителство, убиството се случило во петокот околу 18 часот. Телото на Сјеклоќа го пронашле пожарникари кои добиле пријава дека возило излетало од патот. Како што дознава „Вјести“, мажот бил застрелан преку шофершајбната.

„Жртвата е идентификувана како Б.С. (33). За време на истрагата се пронајдени одреден број траги и чаури, кои ќе бидат испитани во Центарот за судска медицина“, изјави за весникот обвинителката Ана Радовиќ, потврдувајќи дека истрагата е во тек.