Министерството за внатрешни работи ги презема сите неопходни мерки за да се гарантира јавниот ред и мир на Парадата на гордоста, што ќе се одржи на 29 јуни и каков било обид за насилство ќе биде најстрого санкциониран. Ќе имаме доволен број полицајци за да помине се во најдобар ред и мир – соопшти портпаролот на МВР Тони Ангеловски на прес-конференција на Организацискиот одбор на првата Парада на гордоста.

Ангеловски појасни дека МВР пред секој ваков или сличен настан прави план сразмерно на проценките колку луѓе се очекува да бидат присутни на протестот и какви се опасностите, и врз основа на тоа одлучува колку полицајци ќе бидат ангажирани.

Кочо Андоновски од ЛГБТИ центарот за поддршка при Хелсиншки комитет за човекови права потенцираше дека се задоволни од соработката со МВР и изрази убеденост дека овој настан ќе биде безбеден. Како што појасни Андоновски, не би продолжиле со организацијата ако не се сигурни дека навистина можат да ја гарантираат безбедноста на секој учесник.

Тој искажа очекување дека на настанот ќе учествуваат од 200 до 500 луѓе, што според него, би била фантастична бројка за прв „Прајд“ што ќе се одржи во Скопје.

Учесниците Маршот на гордоста на 29 јуни во 11 часот ќе се соберат во паркот Жена Борец, а Маршот ќе почне точно напладне. Крајната точка ќе биде кај Школка во Градскиот парк каде што ќе има обраќања и музичка програма.

Секој учесник на парадата ќе добие алка што ќе му биде гаранција дека присуствува. Со алката секој учесник ќе може слободно да се движи во и надвор од одбележаниот простор. Во градскиот парк, односно кај Школка програмата ќе ја водат дрег кралиците Линда Социјалиста и Каја Мор. Покрај предвидените обраќања, ќе има и музичка програма во која ќе учествуваат Тамара Тодевска, Принцез Донатсу и диџеите Ивана Драгшиќ, Зоки Бејбе, Ири Скреч, Ана Мало и Узун Баба – изјави Јована Јовановска од ЛГБТИ центарот.