Интелектуалната иницијатива за подобрување на квалитетот во универзитетското образование“ (NIRCAU) го претстави своето обемно истражување во кое ги анализира на трудовите на професорите на Медицинскиот факултет при Универзитетот во Тетово.

Во последното издание на публикацијата „Веритас“, како што пишуваат медиумите на албански јазик, тие посочуваат дека научните трудови на најмалку седум универзитетски професори се плагијат или копија на веќе објавени дела, пренесува 360 степени.

Во деталното истражување, посочуваат точно кои делови од трудовите на професорите Неџбедин Беадини, Шеќибе Беадини, Албулена Беадини, Емира Беџети, Мирлинд Беџети, Дестан Халиди, Екрем Исмани не се оригинални, односно се „позајмени“ од други автори.

-Академската нечесност е проблем што го истражувавме неколку месеци. Штетата предизвикана од него е немерлива, бидејќи овој феномен овозможува да се оправда некомпетентноста, која потоа како таква ќе им служи на следните генерации со создавање на ‘нормални’ стандарди, велат авторите на истражувањето.

Тие сметаат дека раководството на Универзитет во Тетово продолжува да ги затвора очите и одбива да прифати дека дел од нивните професори не се автори на делата што ги објавуваат како свои.

-Досега до Ректорската управа поднесовме низа претставки за кражба на интелектуални трудови од професори и докторанди на овој факултет, кои незаслужено напредуваат во академската кариера. Оттаму нема никаков повратен одговор, велат од Иницијативата.