Владата е криминална, тоа го потврдува ГРЕКО. Македонија е држава каде премиерот е криминалец, а министерот за внатрешни главен заштитник на криминалот. Со Заев и Спасовски, Македонија стана дефиниција за заробена држава, изјави членот на ИК на ВМРО-ДПМНЕ, Орце Ѓорѓиевски.

Според него, во извештајот на ГРЕКО полицијата е окарактеризирана како најкорумпирана институција во Македонија, а граѓаните наместо заштитник, во полицијата гледаат криминал и рекетар.

Полицијата е корумпирана, затоа што Заев и Спасовски наместо да бркаат криминалци, преку МВР распишуваат тендерски постапки за делење на милионски бизниси на луѓе блиски до власта. Преку МВР  на најсомнителен можен начин беа доделени неколку лиценци за возачки испитни центри на фирми формирани непосредно пред да биде распишан огласот, без никакво претходно искуство, а од игра беа исфрлени фирми со децениско искуство. МВР е корумпирана и затоа што набави возила во висина од 1 милион евра, вредност поголема од нивната малопродажна цена, изјави Ѓорѓиевски.

Тој додаде дека, како што рече, Заев и Спасовски ја претвориле полицијата во партиско дувло за да им го штити криминалот  и да не постапува  по сомнежите за криминал во кој се вмешани речиси функционери на власта.

Две ипол години нема ниту една акција против функционери на власта, иако цела држава бруи дека рекет мава секој партиски функционер од СДСМ, од маалски шериф до челниците на власта. Господине Заев, немојте да мислите дека ова ќе продолжи вака. Криминалот ќе биде санкциониран, а вие, како и сите други кои ви помагаат во криминализирањето на Република Македонија, ќе одговараат кога ќе се врати правната држава во Република Македонија, рече Ѓорѓиевски.