Ете до каде стигнавме. Да го прославуваме 11 Октомври, Денот на востанието на македонскиот народ, за бугарскиот европратеник Андреј Ковачев претставувало антибугарска провокација! За него веќе и не се знае што не претставува провокација.
И тоа на страна, па си зема за слобода да си поигрува и со народното востание, што со други зборови значи и поигрување со македонското антифашистичко минато.
-Србоман убива Бугарин, татко на три деца и роднина на Даме Груев. Ова се нарекува ‘народно востание’ и се прославува секоја година! Во ЕУ нема место за лагите и антибугарската идеологија, напиша меѓу другото Ковачев на својот ФБ профил.
Е, па, Андреј Ковачев ќе мора да учи и да се привикнува на некои работи. И тоа не е никаков грев, зашто човек цел живот учи. Само сега од документи и од други книги, а не од тие нивните со кои им ги перат мозоците. Па, и он, нели, така вели за нас.
На пример, може да почне од тоа дека не може и не смее да ни наметнува некаква граѓанска војна, наместо антифашистичка. Тоа што Душко Наумовски го етикетира како србоман, а не како Македонец или, според неговото гледање на работите, како Бугарин, тоа си е негова работа.
Бугарската војска сигурно не дошла во Македонија за да бере цвеќе. Дошла да ја окупира Македонија како територија. Како подарок од Адолф Хитлер. И тоа многу убаво се гледа во документот на бугарското Министерство на војната и на Штабот на војската со број 1203 од 22 април 1941 година.
Во документот и се наредува на шестата пешадиска дивизија од 23 април утрото да започне со своите активности за „окупирање на Македонија“. И натаму се наведуваат насоките и патните правци по кои ќе се движат единиците на бугарската армија.
А, од окупација до ослободување има разлика, и тоа огромна разлика. Ете затоа Македонците се кренале на народно востание и на вооружена борба. Какви биле, такви биле, ама биле македонски.
Ковачев нека се обиде да си најде одговор и на прашањето зошто и бугарскиот народ не го сторил истото уште во истата 1941 година, туку чекал до 1944 година да ја смени наци-фашистичката власт во својата земја.
Comments are closed for this post.