Министерството за земјоделство, шумарство и водостопантсво донесе Решение со кое 60 дена пред утврдениот рок се одобрува отстрел на дивите свињи во земјава. Целта како што истакна ресорниот министер, Трајан Димковски е поради опасноста од болеста  „африканска чума“.

„Целта е да се намали бројот на диви свињи со што би се минимизирале шансите за појава и ширење на болеста која е веќе присутна во Бугарија“, рече Димковски.

Од МЗШВ до Владата ќе предложат усвојување и други мерки, како забрана за населување на дивата свиња во ловиштата согласно развојните програми, но и забрана за нејзино зимско прихранување.

„Апелираме до сите концесионери и ловци крајно сериозно да ја сфатат опасноста од оваа болест и да се приклучат во реализирање на превентивните мерки за заштита, порача претседателот на Ловечката федерација Влатко Алексовски.

Според проценките, во земјава има околу 8.000 диви свињи, рамномерно распространети на целата територија. Последниве 20 години бројот на единки е удвоен. Со дозволеното заловување, нема да се оди на биолошки минимум зашто дивите свињи, како што беше речено на прес-конференцијата, се добро од општ интерес како и останатите видови дивеч.

Се уште не е дефинирано како ќе се реализира организираниот отстрел од страна на ловечките друштва, но веројатно најпрво ќе се почне од граничните појаси со Србија и Бугарија.