Претседателот Стево Пендаровски денеска го потпишал Указот за прогласување на Законот за утврдување на јавен интерес и номинирање на стратешки партнер за имплементација на проектот за изградба на инфраструктурниот коридор 8 (делница: Тетово – Гостивар – Букојчани и проектот за автопатот Требеништа – Струга – Ќафасан) и коридорот 10 Д (делница на автопатот Прилеп – Битола) во Република  Македонија.

Од кабинетот на Пендаровски потсетуваат дека Законот е донесен со потребното мнозинство и притоа ниту еден пратеник, или пратеничка група не гласале против.

Сите институции и поединци кои имаат сомневања во однос на уставноста на Законот, можат да се обратат до Уставниот суд кој е единствена надлежна институција за оценка на уставноста на законите и другите општи акти – велат од кабинетот.

Претходно денеска Државната комисија за спречување корупција побара од претседателот да не го потпишува Указот за Законот, а доколку тоа се случи најави дека следниот чекор ќе биде оспорување пред Уставниот суд.

Претседателката на ДКСК Билјана Ивановска, на денешната прес-конференција рече дека овој закон, како целина претставува висок ризик фактор за корупција и судир на интереси и во суштина го суспендира правниот систем во државата, исклучувајќи примена на други закони во целост или делумно. Притоа додаде дека донесениот закон и примената на одредбите на законот во пракса, ќе значи кршење на начелата врз кои се темели борбата против корупцијата и судирот на интереси.

Нема јавен интерес каде што има вакви политички мудрости, сплеткарења. Во функција на јавниот интерес треба отворено, транспарентно да се излезе пред народот и да се каже зошто и како се поставени работите, а не вака од скратена по скратена постапка во Собранието да се донесува закон што е од многу важно значење за целата држава – рече Ивановска.