Автентичните религиозни учења нè повикуваат да останеме посветени на мирот и на одбраната на вредностите на меѓусебното разбирање, човековото братство и хармоничната коегзистенција, порача денеска во Софија поглаварот на Католичката црква папата Франциск.

На средба со претставници на бугарските власти, граѓанскиот сектор и на дипломатскиот кор, понтифот истакна дека секоја религија повикува на хармонија и слога и може да придонесе за развој на културата и опкружување во кое ќе постои целосно почитување на човековата личност и неговиот дигнитет, преку создавање на витални врски меѓу цивилизациите и традициите и преку отфрлање на секоја форма на насилство и омраза.

Тој се осврна и на светите браќа Кирил и Методиј, кои како што рече „ги евангелизираа словенските народи” и ги поставија основите за нивните јазици и култури, јави специјалниот известувач на МИА.

-Благословените Свети Кирил и Методиј, копатроните на Европа, нивните молитви , нивната генијалност и нивните заеднички апостолски напори, можат да ни служат како пример и дури и еден милиениум подоцна да преставуваат инспирација за дијалог, хармонија и братство меѓу црквите, државите и народите, нагласи папата Франциск.

Тој потенцира дека Бугарија е место на кое се спојуваат многу култури и цивилизации и претставува мост меѓу Источна и Јужна Европа, отворена врата кон Блискиот Исток и земја со антички христијански корени, која сега, 30 години по падот на тоталитарниот режим, се соочува со последиците на имиграцијата, при што над два милиони нејзини граѓани заминаа во странство во потрага по нови можности за вработување.

-Во исто време, Бугарија како и многу други земји во Европа се соочува со она што ние го нарекуваме нова зима: демографска зима што како покривка од мраз зафаќа голем дел од Европа… Падот на природниот прираст во комбинација со имиграцијата доведува до депопулација и опустошување на многу села и градови, истакна понтифот.

Тој потенцира дека дополнително Бугарија се соочува со феноменот на оние кои сакаат да ги преминат границите во обид да побегнат од војните, конфликтите и сиромаштијата и да стигнат до најбогатите делови на Европа или да најдат нови можности или едноставно да обезбедат сигурен престој.

На крајот папата им посака мир, просперитет и среќа на Бугарија и нејзините жители.Бугарскиот претседател Румен Радев во обраќањето на средбата истакна дека драматичната историја на Бугарија е полна со војни и страдања, поради што Бугарите ја знаат цената на мирот и дека мир е можен само во услови на хуманизам и толеранција меѓу различните религии и националности.

 Затоа бугарското општетство не толерира ксенофобија и расизам. На само неколку метри една од друга се наоѓаат православен храм, џамија, католичка црква и синагога, нагласи Радев.

Тој потенцира дека денес, кога во Европа повторно се враќаат омразата и ксенофобијата, треба да се потсетиме на светите браќа Кирил и Методиј, кои „го бранеа правото на сите луѓе да го чествуваат Господ на својот јазик.

-Длабокото значење на нивната лекција е дека јазичните и културните разлики не треба да ги спречуваат народите да живеат во мир и почитување на заедничките вредности, изјави Радев, додавајќи дека со папата ја споделува загриженоста за судбината на милиони луѓе, кои се изложени на измачување, сиромаштија, сегрегација и терор.

Инаку, пред обраќањата, тие имаа протоколарна средба на која папата Франциск на Радев му врачи копија од уредбата на папата Пије Единаестти од 1925 година за именување на монсињор Анџело Ронкали, идниот папа Јован Дваесет и трети, за апостолски делегат во Бугарија.

Престојот во Софија папата го продолжи со средба со патријархот себугарски и митрополит софиски Неофит и со членови на Синдот на Бугарската православна црква, на која истакна дека светите Кирил и Методиј, кои нè поврзуваат уште од првиот милемиум и на кои се сеќаваме во нашите цркви, и натаму претставуваат извор за инспирација.

-Кирил и Методиј, Византијци по култура, беа доволно посветени да ја преведат Библијата на јазик прифатлив за словенските народи, со што божјиот збор можеше да се пренесе преку народниот збор. Нивното дело до денешен ден останува модел за евангелизација и предизвик за пренесување на Евангелието на следните генерации, истакна понтифот.

Тој нагласи дека Светите Кирил и Методиј имаат големо значење за европското општетство, бидејќи на своевиден начин тие се промотори на обединета Европа и на мирот меѓу сите европски жители, поставувајќи основа на новата уметност на заедничко живеење преку почитување на разликите.

Папата за врема на средбата на бугарскиот патријарх му подари примерок на книгата Codex Pauli, издадена по повод два милениума од раѓањето на Свети Павле.

По средбата папата и патријархот одржаа молитва пред престолот на Свети Кирил и Методиј во катедралната црква Св. Александар Невски. По молитвата, на плоштадот пред катедралата се одржаа антифон за Богордица, познат како Regina Coeli, при што на папата му беше подарена копија на иконата Пресвета Богордица од Несебар.

Инаку, за врема на летот од Рим до Софија папата испрати поздравни телеграми до претседателите на Хрватска, Колинда Грабар-Китаровиќ, на БиХ Милорад Додик, на Црна Гора Мило Ѓукановиќ и на Србија Алескандар Вучиќ, додека „папскиот авион” ги надлетуваше нивните земји, посакувајќи им мир и сила и благословувајќи ја секоја држава одделно.

Во попладневните часови поглаварот на Римокатоличката црква ќе одржи света миса на плоштадот „Кнез Александар”.

Папата утре, на вториот ден од престојот во Бугарија, ќе го посети бегалскиот камп „Враждебна” во Софија, по што ќе одржи миса во католичката црква Пресвето срце во градот Раковски, во близината на Пловдив, а во попладневните часови ќе го заврши официјалниот дел од посетата со молитва за мир на плоштадот „Независност”. Во вторник папата од Софија ќе допатува во Скопје.