Во пресрет на денешната дебата за договорот за Брегзит помеѓу британската премиерка Тереза Меј и лидерот на опозициските лабуристи Џереми Корбин, медиумите пренесуваат дека Велика Британија треба да размисли за зделка како „Норвешка Плус” со Европската унија, ако премиерката Тереза Меј не добие парламентарна поддршка за нејзниот договор за Брегзит.

Британската министерка за труд и пензии Амбер Руд е првиот член на британскиот Кабинет која јавно зборува за „план Б”, ако Меј доживее пораз на клучното гласање во Парламентот закажано за вторник.

Руд, која го поддржа договорот на Меј за Брегзит, изјави дека е „можно се да се случи”, па и втор референдум, ако Владата не биде поддржана во Парламентот, и најави дека ќе настапи период на хаос.

Во интервју за весникот „Тајмс”, таа рече дека иако ниту една од можните алтернативи не е подобра од сегашната зделка, таа би претпочитала модел, сличен на оној на Норвешка. Земјата не е членка на ЕУ, но е дел од Европската економска зона, што значи дека е дел од заедничкиот пазар.

Таква алтернатива изгледа прифатлива не само за земјата, туку и од гледна точка на пратениците, додаде Руд но истакна дека „никој не знае дали тоа може да се направи”