Саудиска Арабија вчера изврши два напада насочени кон аеродромот во јеменскиот стратешки град Мока, кој сега е под контрола на Хутите, објави телевизијата Ал-Масира.

  • Саудискиот непријател изврши два напада врз аеродромот во Мока – изјави таа телевизија, а објави и „Тајмс оф Израел“.

Јеменските Хути, поддржани од Техеран, вчера ја презедоа контролата врз пристанишниот град на Црвеното Море откако минатата недела започнаа голема офанзива против јеменските владини сили поддржани од Ријад.

Во меѓувреме, Хутите ја презедоа контролата врз целиот брег на Црвеното Море, претходно контролиран од јеменските сили поддржани од Саудиска Арабија. Откако владините сили веќе се повлекоа од Мока, Хутите напредуваа кон југ и наидоа на мал отпор и прво го освоија Дубаб, а потоа Мурад, последниот крајбрежен град што сè уште е во рацете на јеменската влада.

Хутите ја зајакнаа својата контрола врз теснецот Баб ел Мандеб, клучен морски премин чија блокада дополнително би ги загрозила глобалните енергетски резерви, откако Иран веќе го блокираше Ормутскиот теснец.