Министерот за земјоделство и генерален секретар на Движењето БЕСА, Аријанит Хоџа поднесе оставка од функцијата заедно со другите двајца заменици министри од партијата.

Рече дека тоа што вчера се случи во Собранието е срамно. Хоџа смета дека Беса сака да биде дел од власта, но не по секоја цена.

-Одлуката за оставка е морален чин почитување на органите на Движењето БЕСА, рече Хоџа.

Хоџа вели дека ако Алтернатива се приклучи кон власта ќе направи самоубиство.

-Мислам дека секој влез во Влада ваква каква што е, со ДУИ, би било самоубиство за секоја политичка партија. Ако не се седне да се реформира тој дел од режимот мислам дека апсолутно ќе биде погубно за самата партија. Но, оставам тие самите да одлучат. Ние сме подале рака заеднички со Алијанса и со Алтернатива да се споиме во еден блок и сме подготвени за брзи предвремени избори да одиме заедно. Убедени сме дека веќе народот препозна кој е ДУИ и што врши ДУИ оваа држава, изјави Хоџа.

Дел од медиумите вчера почнаа да шпекулираат дека Алтернатива е веќе дел од власта. И координаторот на пратеничката група на СДСМ, Јован Митревски и вицепремиерот Артан Груби вчера кажаа дека парламентарното мнозинство ќе продолжи да се зголемува. Сепак, Груби не одговори дали Алтернатива веќе влегла во власта. Собранискиот спикер Талат Џафери вчера рече дека е можно пратеникот од Беса, Кастриот Реџепи, кој вчера не се појави во Собранието, да е дел од парламентарното мнозинство предводено од СДСМ. Доколку Реџепи и Алтернатива се приклучат кон власта тогаш парламентарното мнозинство би се зголемило на 64 пратеници.