Сашо Мијалков требаше да биде под 24 часовен аудио и видео надзор, така одлучи Кривичен суд, но за тоа МВР нема таква опрема, објави Телма.

„Основното јавно обвинителство за гонење на организиран криминал и корупција соопштува дека обвинетиот Сашо Мијалков во попладневните часови се јави во обвинителството и притоа му е врачено Решение за определена мерка куќен притвор. Пред два дена како резултат на оперативни сознанија кои укажуваа на можност од бегство, на предлог на Основното јавно обвинителство за гонење на организиран криминал и корупција, Основниот кривичен суд – Скопје со Решение на обвинетиот Сашо Мијалков му определи мерка куќен притвор и 24 часовен видео и аудио надзор. До денес обвинетиот беше недостапен за органите на прогонот“, се велеше во вчерашното соопштение од одделението за гонење на организиран криминал и корупција.

Како што објави Телма, Министерството за внатрешни работи немало таква опрема за 24 часовно следење со аудио и видео.

Oва е новина во законот која никој до сега не ја применил, а според извори на Телма во судот ова е прв ваков случај што се применува токму за Мијалков.

Наместо тоа сега од МВР за Телма велат дека распоредиле голем број на полицајци околу куќата па тие ќе го заменат видео надзорот.

Инаку токму додека во неделата полицијата го следела неговото движење тој исчезна и се врати сам со објаснување дека се изолирал поради ковид симптоми.