Германскиот виролог Кристијан Дростен очекува населението во Германија во следните година и половина да стекне имунитет против коронавирусот.

– Тоа ќе се случи со вакцинација или природна инфекција. Овој вирус ќе стане ендемичен и нема да исчезне. Секој што ќе одлучи да не се вакцинира, неминовно ќе се зарази – рече Дростен.

Тој истакна дека против тоа не може ништо да се стори, бидејќи епидемиолошките мерки со време ќе се укинат.

После тоа, вирусот ќе циркулира меѓу населението кај оние кои не биле имунизирани и малите деца кои не можат да се вакцинираат.

– Вирусот незабележливо и понатаму ќе се шири, а потоа ќе наиде на луѓе кои не се вакцинирале – објасни Дростен.

Тој очекува и следната зима да има тешки ковид пациенти на интензивна нега.

– Оние кои активно ќе се одлучат против вакцината, мора да знаат дека со тоа активно се одлучиле за природна инфекција – подвлече тој, додавајќи дека тоа е слободна одлука на секој поединец.