Граѓанската асоцијација „Скопјанката Мајка Тереза“ по 20. пат ја организира манифестација „Денови на Св. Мајка Тереза“, која годинава е под знакот на 109 – годишнината од раѓањето на Св. Мајка Тереза“, којашто традиционално се одвива од 26 август до 5 септември.

Манифестацијата ќе започне денеска (10:00) на датумот кога е родена „Св. Мајка Тереза“, со положување цвеќиња на спомен – плочата на местото на нејзината родна куќа во центарот на Скопје и пред нејзиниот споменик на улица „Македонија“. Активностите продолжуваат во 11 часот во Домот на АРМ, каде сликарот и хуманист Живко Поповски – Цветин ќе ја отвори изложбата на ликовни дела и фотографии посветени на Св. Мајка Тереза и на фотографии на старо Скопје, по што ќе биде промовирана збирката песни „Со почит кон Мајка Тереза“ од група автори.

На 5 септември денот на упокојувањето на Св.Мајка Тереза, во Домот на АРМ со почеток во 20 часот ќе се одржи свечена академија на која ќе бидат доделени традиционалните посланија за хуманост и статуетки со ликот на Св. Мајка Тереза на истакнати хуманисти и здруженија. Годинешни добитници се: граѓанските хуманитарни здруженија „Банка за храна“ (претседател Душко Христов) и „Еурохуман Интернационал“ (претседател Сејфула Бектеши), Општина Центар (градоначалник Саша Богдановиќ), Месната заедница Ласкарци – Општина Сарај, Мики – Ли Мијалчиќ – заменик командир во Полициската станица Центар, Сергеј Самсоненко – бизнисмен и хуманист и Свето Стаменов – новинар на Македонското радио – Радио Скопје, публицист и хуманист.

Во музичкиот дел на манифестацијата ќе настапат Мандолинскиот оркестар при МКЦ – Скопје со солистот на обоа Вултет Назири, под диригентство на Ванчо Јовчев, оперската певица Серафина Фантаузо, а музички партитури на виолина и пијано ќе изведат Ева и Марија Богоевски. Водител на програмата ќе биде Билјана Дебарлиева.